Midi, uno prouvènço de vuei
Architèite dóu dedins, diplouma de Penninghen, signant lou biais d’uno moulounado de boutigo e veissèu amirau internaciounau d’Oustau de lùssi de la bono, Jerèmi du Chaffaut jamai óublido sa Prouvènço natalo. Fiéu d’uno longo lignado d’Auto-Prouvènço remountant au siècle 15en, l’uei agusa pèr si gènt « anticàri à sis ouro perdudo », Jerèmi du Chaffaut se fargo un gàubi : « Au bèu, de gaubeja. Au patrimòni, de counserva ». Alor quouro decido de croumpa un oustau de famiho à Santo-Baumo, ié vèn tambèn l’envejo de lou vesti de moble prouvençau. Cerco que cercaras, mai de-bado. Sènt emé sa mouié qu’es necite de li crea, tout respetous di gàubi terradouren, souto-lignant de soun escrituro d’architèite. Puei, un autre evenimen lis empuro pèr s’avanqui : un ceramisto marsihés, qu’es labelisa entre-presso dóu Patrimòni vivènt, desparèis après manto uno generacioun. « Es coume acò que nasquè noste proujèt en 2019 em’uno prefoundo envejo de revela dins lou biais de vuei li mesteirau d’elèi, de sublima li tradicioun ».
Midi, à l’ouro dis artisan
Après un tour de Prouvènço de mai d’un an, Jerèmi du Chaffaut fai pache ‘mé de ràris artisan, tout desirous de travaia de nouvèlli formo, de mena mai liuen soun gàubi : un ceramisto proche z-Ais-de-Prouvènço, fiéu e falen de terraié, magician de la terro vo encaro lou darrié cadieraire de Camargo, 5enco generacioun d’ebenisto. D’aquéstis assouciacioun, espelisson de moble e d’eisino, fa de man d’ome, dins li matèri li mai bello, sènso ges de soubro, dessina founsieramen, dins uno entènto dóu detai e de perfeicioun. De pèço qu’an pas soun parié countant un lùssi nouvèu, boutant l’ome au cèntre. Lou Radassié – radassa en prouvençau significo feinianteja, s’eslangouira, s’estiro en uno longo banqueto de roure, lou Fautuei vo louCadieras, mostron sis assèti de sagno, un jounc di ribo de Rose. Cadun es mounta caviha à la man. Pèr quant i terraio, soun un biais nòu de legi lis usanço d’à passa tèms. La Bugadiero es un tian vira à la man, la Counsciènci ramento lis eisino carrejant l’òli d’óulivo, que sa moulounado d’encrenaduro leissavo passa li cordo que la retenien is ase.
Midi, vist coume un camin duradis
« Midi es pas qu’un oustau d’edicioun. Es uno idèio, aquelo de voulé tournamai vesita emai enventa li biais de fabrica de nòstis aujòu pèr coungreia d’esperiènci : un equilibre perfèt entre fóuclore, saupre-faire d’elèi, ennouvacioun dins li formo e li moutiéu ». Noun s’agis de fa espeli un moble de mai, un óujèt de trop. Mai de reprendre pulèu lengo emé l’artisanarié, dins l’aparamen e la trasmissioun di biais de faire. Tóuti li matèri matricialo vènon de la naturo, de séuvo de roure en gestioun duradisso vo di ribo de Rose pèr la paio. « Vuei parlan d’acò coume d’ecou-councepcioun mai iéu vole simplamen reveni à ço que fasien nòstis àvi. Acò’s de bon sèn, pas mai, e après de deseno d’an, aquel enançamen terradouren es en trin de s’impausa dins forço doumèni : lou manja, lou vesti … MIDI es l’anti-moble jitable, que finis sus lou trepadou quàuquis annado après, estènt passa de modo vo rout. Pèr eisèmple, tout moble MIDI gasta pèr quàuqui cro de chin que siegue vo …, ebé lou radoube ». Un estudiò de creacioun se dèu groupa tambèn à de proujèt sus-mesuro. Imagina ensèn, alentour d’uno taulo ! es tambèn la marco founso de MIDI.